الزواج المحرم.. 14

الحلقة الرابعة عشر....

وفي نفس اللحظه تستجمع شجاعتها وتقول... أدهم

أدهم: ها؟؟

ريناد : أنت بتحب فريده..

أدهم يتفاجئ يكلام ريناد بس يحاول يعكس عليها الكلام ويقول.. انتي هبله!! .. ما انا طبعا بحبها .. مش اختي!!

ريناد تبصله أوي وبكل إصرار تقول: لأ يا أدهم.. أنت بتحب فريده .. بتحبها وعايز ترتبط بيها..

أدهم يفضل باصص لريناد ومش عارف ينطق ويحس ان الدنيا اتهدت فوق راسه...

ريناد تحس بخوف أدهم وتقرب منه وتحضنه أوي وتقول... يا أدهم أنا أختك.. متخافش مني كده.. صارحني بس علشان أقدر أساعدك .. كلامي صح مش كده؟!

أدهم: ممم .. أ.. أنا يعني..مممم... يا ريناد افهمي بس..

ريناد: لا افهم انت ان مفيش مجال للكدب .. مش هصدق حاجه.. لان الكلام باين في عينيك.. باين في تصرفاتك .. غيرتك عليها.. تعلقك العجيب بيها..  وغيرهم ألف تصرف يبين انك بتحبها

أدهم يعد علي السرير ويحط ايده علي راسه وبنبره أقرب للعياط يقول...

أدهم: أيوة بحبها.. ومش بس بحبها ده انا حياتي مبتمشيش خطوة الا بيها.. مبقدرش ابعد عنها ومبقدرش ابطل تفكير بيها.. ريناد ..فريده دي زي الاكسجين بالنسبالي.. بس انا ابقي ايه بالنسبالها!... نونتها.. اخوها الصغير اللي هيا مربياه.. فريده بتبصلي علي اني طفل يا ريناد.. لسه بتعاملني كده ومش هتغير نظرتها ليا .. انا حبي ليها محكوم عليه بالاعدام وهو لسه مظهرش للنور أصلا !..
وهنا تقاطعه ريناد بسرعه وبعيون مدمعه تقول..

ريناد: ومش هيظهر واصلا مينفعش يظهر.. أدهم والله العظيم انا حاسه بيك أوي.. فاهمه ان أصعب حاجه في الدنيا إنك تحب حد وميبقاش حاسس بيك.. والاصعب اما يكون الحد ده اكتر واحد بيفهمك وقريب منك في الدنيا.. بس  كمان فكر كده لو فريده شمت خبر عن اللي في دماغك ده هتعمل ايه!! أكيد هتاخد جنب منك وتبعد.. وساعتها مش بس هتبقي خسرتها كحبيبه.. أنت هتبقي خسرت فريده اللي روحك فيها ومش هيكون لها وجود في حياتك تاني.. أدهم حاول تفكر في كلامي كويس وخد قرار.. بعد اذنك

تخرج ريناد وتسيب أدهم في حاله صعبه :(

************************************************************************

تاني يوم يتجمعوا كلهم في المطار ويسافروا شرم وينزلوا في فندق قريب من مكان الموقع.. في الوقت ده يكون الكلام بين أدهم وفريده متعداش أزيك..صباح الخير وبس.. وتفهم ملك تصرف فريده علي انه مساعده ليها انها تقرب من أدهم.. لكن أدهم يفهم الموقف أن فريده زعلانه منه.. وفي الحقيقه.. تكون فريده بتحاول تبعد عن أدهم علشان يخرج من قلبها !

يطلع كل واحد فيهم علي اوضته في الفندق وبعد شويه ينزل أدهم.... وبعد ثواني معدوده تكون ملك وراه ويدور الحوار ده..

ملك: تسمحلي أعد معاك :)

أدهم: اتفضلي -_-

ملك: انا عارفه انك لسه زعلان مني.. بس انا بجد مقصدتش اللي انت فهمته..  فريده دي زي اختي والله بحبها جدا.. حتي أسألها ده احنا بقينا اصحاب.. متزعلش مني يا أدهم أرجوك.. :(

أدهم : انا مش زعلان خلاص حصل خير

ملك: ممم طب انت منمتش ليه بقي؟؟

أدهم: عادي مجاليش نوم .. مش متعود انام بالنهار

ملك: اها وانا كمان

أدهم:.......................

شويه وتنزل فريده من اوضتها وتكون هيا كمان مقدرتش تنام ونازله تتمشي.. أول ما تنزل يلمحها أدهم ويقوم ناحيتها بسرعه..

أدهم: فريده

فريده: أيوة؟

أدهم: منمتيش ليه :/

فريده : عادي قولت انزل اتمشي شويه لحد ما يجيلي نوم

أدهم: ممم انا كمان كده

فريده:...............

أدهم: ماهو مش هينفع اللي حاصل بينا ده.. لازم نتكلم

فريده : هو ايه اللي حاصل بينا !.. أنسي مفيش حاجه وانا تمام ونسيت الحوار اصلا

أدهم يحس ان فريده بدأت تاخد منه موقف لاول مرة في حياتها..

أدهم: فريده :( بتكلمني كده ليه !!

فريده: بكلمك ازاي يا ادهم.. قولت خلاص مفيش حاجه.. بعد اذنك بقي

وتسيبه فريده وتروح تسلم علي ملك وتخرج من الفندق.. ادهم يروح ناحيه ملك ويقولها انه طالع ينام.. وتطلع ملك هيا كمان بعد ما فقدت الامل انهم يتكلموا

..............................................................................................................

في الشركه يكون رامي اعد في مكتبه بيشتغل وفجأة تخبط ريناد وتدخله ...

رامي: ايه يا حبي مال وشك مصفر ليه كده ! :o

ريناد: رامي في موضوع مهم لازم نتكلم فيه.. ومش هينفع هنا.. انا منمتش من امبارح ومحتاجه اتكلم معاك

رامي : ممممممممم شكل الموضوع كبير.. طب نخرج بعد الشغل

ريناد: تمام

**************************************************************

في الفندق...

يصحي أدهم من النوم ويحس انه مصدع ويقرر ينزل .. أول ما ينزل يلاقي ملك أعده علي ترابيزة لوحدها بعيد ووشكلها متضايق جدا.. يحس ادهم انه كان قليل الذوق معاها وانه من الواجب يروح يشوف مالها بما انها لوحدها

يقرب أدهم من ملك ويلاقيها اعده بتكتب ومش واخده بالها منه... غصب عنه عيونه تروح للي هيا بتكتبه ويتصدم...

أدهم.. انا فعلا حبيتك.. للاسف انا متاكده انك مبتحبنيش.. وحاولت اقرب منك بس مفيش مجال.. قلبك ملك واحده وللاسف مفيش مجال للمنافسه.. انا دخلت موضوع خسران وانا اللي سمحت لنفسي اني اواجه العذاب ده كله لما حبيتك كده من غير سبب.. يا ريتني أعرف انا ليه متعلقه بيك كده مع انك لحد النهارده عمرك ما كلمتني يوم بطريقه تحسسني بوجودي .. انا اللي جبته لنفسي :) وانا اللي هتحمل لوحدي .. لا عرفتك اني بحبك ولا هعرفك اني بتعذب..

يفضل أدهم واقف متسمر مكانه ويحس انه عايز ياخد ملك في حضنه ويتأسفلها !... وفجأة ترفع ملك عينها وتشوفه واقف باصصلها وعيونه مدمعه.. تسيب ملك مكانها وتخرج بسرعه من الفندق..وأدهم يعد مكانها ويمسك الورق ويفضل يقراه أكتر من مرة....

أدهم لنفسه.. انا ايه اللي بيحصلي ده.. هيا ليه صعبت عليا كده !.. انا مش حاسس ناحيتها بحاجه.. بس حاسس بعذابها أوي.. انا زيي زيها.. انا كمان بحب واحده مش هتحس في يوم بيا,, ولا عمرها هتكون من نصيبي.. بس انا مبحبش ملك.. أعمل ايه!.. هظلمها لو ارتبطت بيها لمجرد اني متعاطف معاها وحاسس بوجعها.. ااااااااااااه يا تري اللي جاي شكله ايه يا أدهم :(

**********************************************************************

بعد الشغل ياخد رامي ريناد ويطلعوا يقعدوا في مكان وتبدأ ريناد تتكلم....

ريناد: انا كلمت أدهم يا رامي

رامي بقلق: مممم وقال ايه؟

ريناد: زي ما كنت متوقعه

رامي بحزن: مم اللي هو ايه يا ريناد :(

ريناد: بيحب فعلا ومش أي حب ده واقع علي الاخر

رامي : :(

ريناد: المشكله مش في كده يا رامي

رامي : ازاي يعني .. المشكله في كده.. اختي هتتعب يا ريناد.. ملك هتتعذب وانا خايف عليها

ريناد: مش ملك لوحدها اللي هتتعذب يا رامي

رامي : تقصدي ايه؟؟ :/

ريناد: أنت عارف ادهم بيحب مين !!

رامي : لا  معرفش.. مين يعني !

ريناد: فريده :)

رامي : :o :o

ريناد : :/

رامي : فريده !! فريده اللي هيا .. فريده يعني !!

ريناد : ايوة فريده  -_-

رامي : يا نهار اسود!! دي أكبر منه بست سنين.. ده غير انها متربيه معاكوا وزي اخته !!

ريناد: المشكله انها بتعامله علي انه اخوها الصغير ومش حاسه بيه.. يعني أدهم في نفس حاله ريناد

رامي : ده ايه الدوامه دي بس يا ربي :(

ريناد: الكلام ده سر بينا لحد ما نشوف الموضوع هيرسي علي ايه

رامي : حاضر :/

**********************************************************************

يفضل أدهم مكانه  ويحس انه تعب من كتر التفكير.. بس اللي متاكد منه انه مش هيقدر يحب حد غير فريده.. وفجأة يلاقي فريده داخله الفندق وأول ما يشوفها يجري عليها وهو شبه بيعيط ويقول..

أدهم: فريده :(

فريده تبصله وتضايق من شكله وتقول.. مالك يا أدهم عينيك مالها مدمعه ليه كده

أدهم : انا بجد محتاج اتكلم معاكي

فريده : ممممممم طيب اتفضل

يقعدوا الاتنين علي ترابيزة ويبدأ أدهم يقول..

فريده انا بجد اسف,, انا معرفش انا كلمتك كده ازاي.. انا عارف اني كنت سخيف وعديم الذوق.. بس انا كنت مضايق اما حسيتك مخبيه عني.. انا .. انا.. انا بس متعود انك بتحكيلي كل حاجه.. بس انا عرفت انك لا يمكن تتصرفي غلط.. سامحيني :(

فريده : حصل خير انا مش زعلانه :)

أدهم: طب انا عايز أقولك علي حاجه :(

فريده : قول في ايه..؟

أدهم .. أقري الورقه دي..

فريده تاخد الورقه وتقرأها ومفيش اي انفعال يبان علي وشها ..

أدهم: ايه ده.. انتي مستغربتيش اللي قريتيه!!

فريده : بص يا أدهم.. ملك بتحبك وباين عليها .. وانا كنت حاسه بكده.. هيا بجد بنت رقيقه وحساسه وبتحبك أوي.. ده غير انها جميله ومن عيله ومناسبه ليك.. فكر كويس قبل ما تاخد قرار :)

أدهم وهو مخنوق.. بس انا مبحبهاش

فريده تضغط علي أعصابها وتقول : مع الوقت هتحبها... من حبها ليك هتحبها .. انت بس أديها فرصه تقرب منك

أدهم بحزن.. يعني انتي شايفه كده :(

فريده وهيا بتقاوم انهيارها: ممم اه :)

أدهم يبص لعيون فريده ويقول: والدموع اللي في عيونك دي ليه !!

فريده : دموع ايه دي -_-

ادهم .................... :(

فريده : أدوا نفسكوا فرصه وربنا يتمملكوا بخير :) .. ودلوقتي انا هطلع علي أوضتي بقي...

تطلع فريده علي أوضتها ويا دوب تدخل تلاقي الباب بيخبط تفتح تلاقي أدهم في وشها..

فريده :؟؟؟؟؟؟؟؟؟؟؟؟

أدهم: فريده أنا قررت أخاطر وأقول اللي جوايا ويا صابت  يا الدنيا أتطربقت 

فريده : !!!!!!!!!!!!!!!!!!!!!!

أدهم: فريده .... أنا بحبك

فريده : ........................... :o


يا تري فريده هترد علي أدهم أزاي... وهل هتسمح لنفسها تقرب علي حساب ملك؟؟ وايه هيكون رد فعل ملك علي أدهم بعد ما شاف الورقه.؟؟

تابعوني <3